Tak rychtyk  to wygrano niy boła samek nojważniejszo. Podstawowom misjom k?nkursu, wspołôrganizowanego bez Muzeum Miejski w Żorach, jes na dyć promocjo jynzyka ślonskigo. Istota wachowanio i promowanio ślonskij godki w sferze publicznej jak tyż prywatnej podkreśloł już na wstympie gość szpecjalny imprezy, pan wiceprezydynt Żor, Daniel Wawrzyczek.

Jeszcze przed ôficjalnym ôtwarciym zatańcowały do nos przedszkolaki z Rogoźnej, a wiersz pt. „Jajco”, pedzioł nojmłodszy solista, piyncioletni Damian Krzystała. Hneda po tym na scynie zaprezyntowały sie bajtle z klas I-III. Samek nojlepszo ôkozała sie Wichtora Wyrobek i nij tekst ô gołymbiorzach. Jednak razym ś niom piyrszy plac dostoł tyż Patryk Cimała, kiery ôpedzioł nom jak nikiedy biyda sie dogodać na goroliji. Niyskorzij przeglond zwyczajow Wielkij Nocy w lokalnej rajsko-kokoczyńskij scynerii doł zwyciynstwo Dance Badurze w kategorii uczniow starszych.

W kategorii scynek I-III jury miało lekki dylymat, ale zwyciynstwo prziznało „Klachulom” z SP 16 w Żorach. Durś bezkonkuryncyjny boł za to duet Wichtora Jucha – Szymon Zimończyk i to niy yno skuli tego, że sztartowali ôni jako jedyni w kategorii duety I-III. Przewodniczonco jury, pani Zofia Przeliorz zdecydowała sie ekstra wyrożnić Szymona, za profesjonalno rola tytułowego lebra.

Do wielkigo finału w scynkach dziecek starszych stanyły dwie żorski ekipy, SP 16 i SP 11. Wygrali ci drudzy, Rajany. Ich „Kuramin”, lyk na wszyjsko, pokonoł pofyrtanego dochtora z os. Korfantego. Medycyna niykonwyncjonalno ôkozała sie lepszo ôd polskij służby zdrowio, kiero jednak zasłużyła na zaszczytny drugi plac. Przegrać w finale to niy gańba!

Jakby sie niy dziwać. Impreza skończyła sie sukcesym. Mono niy wszyjscy godali perfekcyjnie po naszymu, ale pani Zofija tym bardzij ich pochwolyła za ôdwoga i dobre chynci. Radzi mogiymy być przede wszyjskim z tego, że nasz konkurs, kiery niydowno chycioł ranga wojewodzkigo, prziciongo już niy yno artystow z Żor i nojbliższych ôkolic. Nikierzi zrobiyli dobry konsek drogi wiyncyj, coby być w czwortek z nami. Styknie wymiynić yno gości z Turzy Ślonskij, Wodzisławia, czy Krziżowic. Dziynki wom sztyjc sie rozwijomy. Niychby na bezrok było nas wiyncyj a poziom szoł w gora! [GB]

Fot. Daria Leśniak

info. MM